دى متنفعش مراتى

**minagou** الثلاثاء أكتوبر 12, 2010 12:52 pm

دى متنفعش مراتى

تبقى غلطان لو مخدتش بالك من كل صغيره وكبيره قبل وأثناء فترة الخطوبه خصوصا فى أولها…لانه ممكن بعد شويه هتلاقى سكة التراجع صعبه وساعات مستحيله…
فى البدايه مفيش انسان كامل وانا وانت اولهم ولما ربنا هيزرع المحبه هتقبل العيوب البسيطه ببساطه وهتحاول تعدلها وحتى لو متعدلتش مش مشكله وهى كمان هتلاقيها بتعمل معاك كده
لكن فى حاجات مينفعش تجاهلها وفى حاجات صعب جدا تغيرها…هنا يبقى لازم وقفه ولازم متعاندش صوت ربنا
وحتى لو خسرت ماديا افتكر بسرعه الآيه
“لانه ماذا ينتفع الانسان لو ربح العالم كله و خسر نفسه او ماذا يعطي الانسان فداء عن نفسه” (مت 16 : 26)
ممكن نضرب أمثله…. لماالام هى اللى تطلب شبكه غاليه جدا لازم تسأل روحك فين دور الاب؟
غالبا هتطلع العيله دى ماديه جامد ولو انت ملكش فى المظاهر يبقى فكر مرتين… ممكن تجيب الشبكه لكن هترضى ان الفرح يجيبوا فيه رقاصه عشان ميبقوش أقل من فرح بنت عم فلان وطنط فلانه؟؟ وعلى فكره الحكايه دى حصلت مع واحد صاحبى خادم وسمح لى اشاركم بيها
فكر يا صديقى وخد وقتك ومتستعجلش
ولما تلاقى ان اهتمامات خطيبتك وبيتها كلهاتقريبا بعيده عن الكنيسه…يبقى افتكر سفر ملوك التانى اشمعنى؟
لانك هتلاقى فيه ملك اتجوز بنت ملك … ولازم بنت ملك ومن أسره ملكيه طبعا… لكن المهم النتيجه فى الآخر كانت ايه: “و في السنة الخامسة ليورام بن اخاب ملك اسرائيل و يهوشافاط ملك يهوذا ملك يهورام بن يهوشافاط ملك يهوذا. وسار في طريق ملوك اسرائيل كما فعل بيت اخاب لان بنت اخاب كانت له امراة وعمل الشر في عيني الرب.” 2 مل 8: 16-18
“في السنة الثانية عشرة ليورام بن اخاب ملك اسرائيل ملك اخزيا بن يهورام ملك يهوذا. وسار في طريق بيت اخاب و عمل الشر في عيني الرب كبيت اخاب لانه كان صهر بيت اخاب.” 2 مل 8: 25-27
الكتاب المقدس نفسه بيعلن بوضوح تأثير الاسره على الفتاه وتأثيرهاالمدمر فيما بعد على زوجهاوربنا يحفظنا
طبعا فى استثناءات لكن خلى بالك واتأكد كويس ولازم ربنا يكون فى الموضوع من أوله لآخره وده شرط النجاح الأكيد
لو لقيت نفسك من ساعة ما عرفتها بتبعد يوم وراء التانى عن ربنا… يبقى أكيد متنفعكش
لو لقيت اهتماماتكم بعيده قوى عن بعض
ولو لقيت نفسك بدل ما تكون فرحان جاتلك كآبه وغم يبقى أكيد فى حاجه غلط
لو لقيت كل أسرارك بتقولها لمامتها يبقى حياتك الجايه كلها ممكن تبقى فى ايد حماتك
لو لقيتها كل شويه بتحكى عن مين كان هيموت ويخطبها ومين كان هيعيش لو ارتبط بيها يبقى لازم تسأل نفسك هى دى بنت ربنا اللى هتصون بيتك ولا ممكن تكون غلطت فى العنوان؟؟؟
لما متلاقيش منها ومن اسرتها غير الاهتمام فى امور الماده والجسد والعالم ونادر لما تلاقى علاقه حقيقيه حيه بربنايبقى لازم تخلى بالك…
حكى لى نفس الصديق وسمح لى بمشاركتكم انه لما كثرت الاختلافات بينه وبين خطيبته واهلهاأخذ خادم فاضل من خدام الرب واستأذنهم الزياره وحكى انه لما طلب الخادم الصلاه هربت الام بمليون حجه وحجه أماالاب فقعد هاتك يا ضحك طول الصلاه… معذور أصل الظاهر انه من سنين وسنين موقفش وقفه صلاه … هكذا خاطبنى الصديق وهو متأثر واكمل انه أخذ الخادم الذى كان فى غاية الحزن وسمع لمشورة الآباء وخرج ولم يعد لهذه الأسره…. وربنا يفتقد كل اولاده بنعمته ويصلحنا بمراحمه ورأفته.